Patti Smithek bere “Dreams of live” dokumentalean
adierazten zuen oso sakon heltzen zaidan esaldi hau:
Nire misioa komunikatzea da,
jendea esnatzea, nire energia pasatzea
eta nik haiena onartzea.
Denok bat eginda gaude eta nik emozionalki erantzuten dut,
emakume batek, ama batek, artista batek,
ahots bat duen gizaki batek bezala erantzuten dut.
Denok dugu ahots bat.
Trebatzeko erantzukizuna dugu, erabiltzekoa.
Laborategi honetan, urte hauetan guztietan dantzari eta performer gisa garatu ditudan praktikak partekatzea interesatzen zait, beste diziplina batzuetako artistekin (musika, moda edo zinema, adibidez) egin ditudan sorkuntza eta kolaborazioen bidez.
Gorputza leku arkeologiko bat bezala ulertzen dut, beste gorputzen edukiontzia, eta mugimendua bere geruza sakonenak lurpetik azaleratzeko erabiltzen dugun tresna bezala. Ikerketa honetarako erabiltzen dudan metodoa inprobisazioa da, hainbat lekutatik gidatua. Indusketa prozesu bat proposatuko dut, gorpuztasun desberdinekin, gorputza osatzen duten materialak ezagutzeko: hezurrak, giharrak, fasziak, substantziak, imajinarioak, soinuak, ideiak, sinesmenak, emozioak, sentsazioak eta haragitutako jakinduria guztia. Begirada landuko dugu, etena, entzutea, ahotsa gorputz-adar ikusezin bezala, artikulazioen independentzia eta haien loturak ulertuz. Gorputza erresonantzia-kaxa gisa aztertuko dugu, gorputza fikzionatzeko, hedatzeko eta berrasmatzeko duen gaitasuna. Lan honetan modu kontzienteago batean barneratzeko, lau gorputzetan zentratuko gara: fisikoa, energetikoa, emozionala eta soinuduna. Jolasaren bidez, ereduak apurtu eta aukera berriak zabalduko ditugu, gure behar eta interesei erantzungo dieten beste lege batzuk sortzera gonbidatuko gaituztenak.
Tailer honen helburu nagusia deskubritzeko, kuxkuxeatzeko, gozatzeko eta arriskatzeko beharra piztea da, akatsaren edo porrotaren ideiari beldurrik gabe. Apaltasunetik ezagutza handiago batera hurbiltzea. Garen horretara hurbiltzen gaituen barne-ahots hori entzutea, alegia, gure ustez garenetik harago joatea eta kanal bihurtzea. Hazi eta irekitzeko barnera begirako bidaia, ez dakiguna beldurrik gabe bizitzeko.
Norentzat: Dantzariak, performerrak, sorkuntzan eta mugimenduaren arteetan interesa duten pertsonak